Ils sis commembers da la suprastanza, elegid(a)s a chaschun da la radunanza constitutiva dals 23 da matg 2023 èn sa deditgad(a)s dapi lura a la creaziun da las basas da l’instituziun. La stad 2023 èn els/ellas vegnid(a)s sustegnid(a)s da duas collavuraturas, alura d’in directur il favrer 2024, e d’ina responsabla per la communicaziun il matg 2024.

La suprastanza ed il directur da la ISDU han gia realisà numerus contacts e rapports cun acturas ed acturs da la societad civila en Svizra, cun servetschs administrativs da la Confederaziun e dals chantuns, cun represchentantas e represchentants  dad organisaziuns internaziunalas sco era cun autras instituziuns per ils dretgs umans.

Durant l’emprim onn da sia existenza ha la ISDU surdà dus gronds mandats per preparar il focus da sia missiun. D’ina vart ina inventarisaziun da la situaziun dals dretgs umans en Svizra, e da l’autra vart in portal d’infurmaziun davart questa tematica.  

Cun il sustegn d’ina cussegliadra externa, han la suprastanza ed il directur lavurà – e cuntinuà a lavurar – vi da l’elavuraziun d’ina strategia che permetta a l’instituziun durant il 2024 da definir ses emprims accents tematics, da constituir  sia squadra da spezialis(a)s da dretgs umans en concordanza cun questas prioritads e da planisar en detagl l’emprima fasa da svilup da l’instituziun (enfin il 2026).

La ISDU vegn ad investir era en il segund onn da sia existenza blera energia en il svilup da sias structuras. Il persunal da ses secretariat vegn perquai cumplettà vinavant la segunda mesadad dal 2024. L’access strategic vegn ad esser terminà per questa emprima fasa da svilup. L’instituziun vegn era a pudair entschaiver cun emprimas activitads che correspundan a sias incumbensas.

Leger il rapport d’activitad en tudestg, franzos u talian.